Kota factory-ek prem kahani !

Kiye ho kabhi kisise?

Ya yun kahe ki, 'pade ho kisike pyaar mein?'

Ek anjana sheher ,

anjani si galiyan,

anjane chehro ke bich jana pehchana sa ek ahsaas bhar hota hai,

Pyaar iktarfa sahi, usme aag barabar hota hai!

Isse pehle kabhi itna bhi akelapan mehsoos nahi hua , tabhi shayad irada toh tha nahi magar dil ke ek katre ne unse mohabbat kar li ! Sach kahu toh woh pyar mein padne wali baat hi kuch aisi hoti hai, najayaz hi sahi usme apnapan gazab ka hoti hai. Chah kar bhi uske paar na aa paya.

Par Kota mein jo thehra, in sab lafdo mein padna hi kha tha. Soch liya, ki inorganic ke chalte unhe bhi apne life ki exception banakar rakh lenge. 'Kota factory' humne bhi dekhi hai, humara par kuch alag hi scene tha. Na unhein maheshwari mein jana tha aur na hum itne kabil ki tuition dete phirte.

Humein aaj tak badi safai se yaad hai,jab unko humne pehli baar E building ki 5th floor pe dekha tha. Laga jaese subah subah jo dahi paratha khake sala acidity ke mare dil jal rha tha... ek pal mein thandaa ho gya! Un dino humari classes har din alag alag rooms mein li ja rahi thi! Hum late pahuche aur humein laga harbari mein galat pata note kar liye hai ! Warna humein toh humari kismat ka pata tha !

Phir agle hi pal bholenath ne kripa barsadi ho jaese, pata chala woh darasal new student thi aur uska admission mere hi batch mein hua. Introvert kism ki larki thi bilkul, meri hi tarah 'same to same'. Ismein nuksan bhale yeh tha ki doubt classes mein bhi unse baat hone ke koi chances nahi the , par kisi aur se patne nhi wali thi, iss baat ki assurity bhi toh thi na !

Bus itne se hi khush the hum. Aaadha saal nikal gaya dekhte dekhte! Exam hall mein ek hi kamre mein baithi thi woh. Aaj tak uska naam nhi pata tha humein, aur isi bahane woh bhi pata chal gya! Mulakatein yun ki meri bench darwaze ke bilkul saamne lagi thi aur har roz unse ankhein takra jaya karti thi...

Woh balcony se bahar dikh rhe badalon ke bich paper shuru hone ke pehle jo kuch seconds ke liye revise karti dikhti humein! Humara dahi shakkar toh waese hi hota rha , kya bataye!!

Madam ka naam 'kalpana' maloom para. Dekhte hi dekhte naam se bhi pyar ho gya humein toh ! Hum pyar bhale hi karte the par pagal nhi the . Unn char diwaron ke bich padhte padhte jab dil bhar aata tha , toh kabhi unki yaad se behal jate the bus!

Kalpana se kabhi na wasta banana tha aur na banaya! Maa kasam aaj tak apne yaaro doston mein ek bhi baar uska naam nhi liya maine, siwaye nukkar ke chai wale ke alawa aur kisi ko nhi pata tha!!

Woh bhi isliye ki do saalon mein uss din pehli baar dil tuta tha mera! Humari saari classes lagbhag khatm ho aayi thi, logon ka aana bhi ab dheere dheere kam hota chala gya. Woh, pichle do hafton se nhi aayi thi aur humne bhi apne aapko samjha hi liya tha. Uss din sir jab attendence ke liye naam padhne lage toh log itne kam the ki pehli baar apne classmates ke naam maloom parne lage mujhe.

Unmein se ek thi kalpana.

Uss larki ko dekh ke ek pal ke liye toh main boura sa gya tha, phir laga issi naam wali aur bhi toh hongi ! Bechaini badhne lagi, main sir k padhe gaye har naam ko gaur se sunta gya par kalpana toh sirf ek hi thi. Aakhir tak issi umeed mein baitha rha ki ek aur bar bus , Sir kalpana ka naam pukar de par kalpana toh bus ek hi thi...

Najane aakhir tum kha se thi? Kya pata kabhi tumse mulaqat hogi bhi ki nahi? Agar kabhi zindagi ke kisi mod par dikh gayi toh do pal hi sahi tumhara raasta zarur rokunga. Bus itna kehna hai ki tumne anjane mein hi sahi mera bohot sath nibhaya hai. Suno, tumhara naam kya hai?